काठमाडौँ । नेपाल राष्ट्र बैंकले उपदान तथा पेन्सन कोषमा सञ्चित रकमबाट ६ अर्ब ६० करोड रुपैयाँ वाणिज्य बैंक, राष्ट्रिय स्तरका विकास बैंक र वित्त कम्पनीहरूमा मुद्दति निक्षेपका रूपमा लगानी गर्ने भएको छ।

केन्द्रीय बैंकका अनुसार

• वाणिज्य बैंकमा — ५ अर्ब २८ करोड

• विकास बैंकमा — ९९ करोड

• वित्त कम्पनीमा — ३३ करोड
  निक्षेप राखिनेछ।

३६६ दिनका लागि मुद्दति निक्षेप

यो निक्षेप १८ डिसेम्बर २०२५ देखि १८ डिसेम्बर २०२६ सम्म, अर्थात् ३६६ दिन अवधिको हुनेछ।

निक्षेपका लागि योग्यता–शर्त

निक्षेपका लागि प्रस्ताव पेस गर्न सक्षम बैंक तथा वित्तीय संस्थाहरूले यी शर्तहरू पूरा गर्नुपर्नेछ—

• सञ्चालनमा आएको कम्तीमा २ वर्ष पूरा भएको हुनुुपर्ने

• राष्ट्र बैंकले तोकेको न्युनतम पुँजीकोष कायम गरेको हुनुुपर्ने

• निष्क्रिय कर्जा (NPL) ५% भन्दा कम हुनुपर्ने

• तरलता अनुपात केन्द्रीय बैंकले तोकेको सीमा भित्र हुनुुपर्ने

• कर्जा/निक्षेप अनुपात (CD Ratio) निर्धारण गरिएको सीमा भित्र हुनुुपर्ने

• संस्थाले अघिल्लो आर्थिक वर्षमा खुद मुनाफा कमाएको हुनुुपर्ने

कारबाही तथा नियमन सम्बन्धी शर्त

• जरिवाना पाएका सञ्चालक वा सीईओ संस्थामा कायम भएमा, जरिवाना भुक्तान भएको ६ महिना पूरा भएको हुनुपर्ने

• शीघ्र सुधारात्मक कारबाहीमा परेको भए, फुकुवा भएको ६ महिना बितिसकेको हुनुपर्ने

• राष्ट्र बैंकमा समस्याग्रस्त घोषणा नभएको हुनुपर्ने

• सर्वसाधारणका लागि छुट्याइएको सेयर जारी गरिसकेको हुनुपर्ने

ब्याजदर प्रस्ताव पठाउने म्याद

राष्ट्र बैंकले निक्षेप लिन इच्छुक बैंक तथा वित्तीय संस्थाहरूलाई कात्तिक ४ भित्र ब्याजदर प्रस्ताव पठाउन निर्देशन दिएको छ।