काठमाडौँ । राष्ट्रपति रामचन्द्र पौडेलले मतदाता नामावली ऐन २०७३ को दफा ४ को उपदफा २ को संशोधन गर्दै अध्यादेश जारी गरेपछि अब मतदाता नामावलीमा नाम छुटेका व्यक्तिहरूले दर्ता गराउन सक्ने व्यवस्था खुलेको छ।

निर्वाचन आयोगका सूचना अधिकारी सुमन घिमिरेका अनुसार, अध्यादेशले कानुन बमोजिम मतदान गर्न योग्यता पुगेका व्यक्तिहरूका लागि नामावली संकलनको बाटो खोलिएको छ। आयोगले यसको लागि आवश्यक निर्णय गरी मतदाता नामावली संकलनको मिति तोक्नेछ।

यो कदम जेनजी युवा आन्दोलनपछि गठन भएको अन्तरिम सरकारले आगामी फागुन २१ गतेका लागि तोकेको निर्वाचनको तयारीसँग सम्बन्धित छ। संशोधनअघि, निर्वाचन मिति घोषणा भइसकेपछि मतदाता नामावलीमा नयाँ नाम दर्ता गर्न पाइँदैनथ्यो, जसले युवाहरूको राजनीतिक सहभागितामा कानुनी बाधा सिर्जना गरेको थियो।