काठमाडौँ - यही असोज २८ गतेदेखि गण्डकी प्रदेशमा हुन लागेको नवौं राष्ट्रिय खेलकुद प्रतियोगिताका लागि पाँचथरका १९ खेलाडी छनोट भएका छन्। विभिन्न १७ खेलमा सहभागी १ नं प्रदेशस्तरीय छनोट प्रतियोगिताबाट १२ खेलबाट उनीहरु छनोट भएका हुन्।

पाँचथरबाट पुरुष फुटबलमा १, महिला फुटबलमा १, आइटिएफ तेक्वान्दो (पुरुष) मा २, आइटिएफ तेक्वान्दो (महिला) मा १, फुल कन्ट्याक्ट कराँते (महिला) मा ३, पुरुष शारीरिक सुगठनमा १, जुडो (पुरुष) मा १, कुस्ती (पुरुष) मा १, कुस्ती (महिला) मा २, रग्बी पुरुष र महिलामा २/२ तथा पुरुष बुद्धिचालमा १ खेलाडी छनोट भएका जिल्ला खेलकुद विकास समितिका अध्यक्ष सन्तोष मोक्तानले जानकारी दिएका छन्।

छनोट भएका खेलाडीलाई जिल्ला खेलकुद विकास समितिले बिहीबार फिदिममा बधाई तथा शुभकामना कार्यक्रममार्फत बधाई ज्ञापन गरेको छ। प्रदेशस्तरीय छनोट प्रतिस्पर्धामा पाँचथरले ११ स्वर्ण जितेको थियो।

प्रदेश नं १ का विभिन्न जिल्लामा गत भदौ २९ गतेदेखि यही असोज ८ गतेसम्म सञ्चालित प्रदेश छनोट प्रतिस्पर्धामा पाँचथरले आइटिएफ तेक्वान्दोमा ३, फुलकन्ट्याक्ट करातेमा ३, कुस्तीमा ३ तथा जुडो र शारीरिक सुगठनमा १/१ स्वर्ण पदक जितेको थियो।