काठमाडौँ - आईसीसी टी-ट्वान्टी पुरुष विश्वकप क्रिकेटमा अष्ट्रेलियाले जित निकालेको छ। शुक्रबार भएको खेलमा अष्ट्रेलियाले अफगानिस्तानलाई ४ रनले हराएको हो।​ एडिलेटमा अष्ट्रेलियाले दिएको १६९ रनको लक्ष्य पछ्याएको अफगानिस्तानले २० ओभरमा ७ विकेट गुमाएर १६४ रन मात्र बनाउन सक्यो।

अफगानिस्तानका लागि राशिद खानले अविजित रहदै ४८ रन बनाएका थिए। त्यस्तै गुल्बादिन नाइबले ३९ रन बनाउदा रहमानउल्लाह गुरुबाजले ३० रन जोडे।​ अष्ट्रेलियाका जोश हाजलउड र एडम जाम्पाले २/२ विकेट लिएका थिए।

यसअघि पहिले ब्याटिङ गरेको अष्ट्रेलियाले २० ओभरमा ८ विकेट गुमाएर १६८ रन बनाएको थियो। अष्ट्रेलियाका लागि ग्लेन म्याक्स्वेलले अविजित रहँदै ५४ रनको अर्धशतकीय पारी खेलेका थिए। त्यस्तै मिचेल मार्शले ४५ रन जोड्दा मार्कुस स्टोईनिस र डेभिड वार्नरले समान २५/२५ रन बनाएका थिए।

अफगानिस्तानका लागि नभिन उल हकले ३ विकेट लिए। फजलहक फारुकीले २ विकेट लिए। जितसँगै अष्ट्रेलियाले सेमिफाइनलमा पुग्ने सम्भावना कायम राखेको छ।

समूह १ मा रहेको अष्ट्रेलियाले ५ खेलमा ७ अंक जोडेर दोस्रो स्थानमा रहेको छ। अफगानिस्तान ५ खेलमा २ अंक जोडेर पुछारमा छ।