काठमाडौँ - फ्रान्सका स्ट्राइकर करिम बेन्जिमा विश्वकप फुटबलबाट बाहिरिएका छन्। प्रशिक्षणका क्रममा तिघ्रामा चोट लागेपछि बेन्जिमाले विश्वकप गुमाउने पक्का भएको बीबीसीले जनाएको छ।

रियल म्याड्रिडलाई च्याम्पियन्स लिग र ला लिगा जिताउन मद्दत गरेपछि बेन्जिमाले २०२२ को बालोन डी’ओर जितेका थिए। फ्रान्सेली राष्ट्रिय टोलीले उनलाई तिघ्रामा समस्या भएको र प्रतियोगितामा सहभागी हुन नसक्ने बताएको छ। फ्रान्सेली फुटबल महासंघले एमआरआई स्क्यानले तिघ्राको मांसपेशीमा चोट लागेको पुष्टि भएकाले बेन्जिमालाई ३ हप्ताको रिकभरी अवधि चाहिने जनाएको छ।

समूह डी मा रहेको फ्रान्सले नोभेम्बर २२ मा अष्ट्रेलिया, २६ नोभेम्बरमा डेनमार्क र ३० नोभेम्बरमा ट्युनिसियासँग खेल्नेछ। फ्रान्सका लागि ९७ खेलमा ३७ पटक गोल गरेका ३४ वर्षीय बेन्जिमाको चोट फ्रान्सलाई विश्वकपका लागि अर्को झट्का हो।

चोटकै कारण मिडफिल्डर पाउल पोग्बा र एनगोलो कान्टे पनि टिममा छैनन्। डिफेन्डर राफेल वाराने आफ्नो विगत ५ क्लब खेलहरू गुमाएका खेल्नका लागि फिट हुन प्रयास गरिरहेका छन्।

म्यानचेस्टर युनाइटेडका फरवार्ड एन्थोनी मार्शल बेन्जेमाका लागि आउन सक्ने सम्भावित विकल्पमध्ये एक हुन्  जो अक्टोबरदेखि तिघ्राको समस्यासँग संघर्ष गरिरहेका थिए।