काठमाडौँ । गए राति बुधबार ताप्लेजुङमा दोस्रोपटक हिमपात हुँदा चिसो बढ्न गई जनजीवन प्रभावित भएको छ। 

समुद्र सतहदेखि तीन हजार ४०० मिटर उचाइमा अवस्थित फक्ताङलुङ  गाउँपालिका–६ घुन्सागाउँलगायत क्षेत्रमा हिमपात भएको छ। हिमपातसँगै जाडो बढेपछि यहाँको जनजीवन प्रभावित बनेको हो। गए राति बाक्लो हिमपात भएको  घुन्साका केल्साङ शेर्पा बताउँछन्। उनका अनुसार हिमपातले निम्त्याएको चिसोका कारण घरबाट बाहिर निस्कनसमेत समस्या भएको छ।  चिसो बढेकाले बालबालिका र ज्येष्ठ नागरिक बढी प्रभावित भएका छन्। घुन्साका टासीतेन्जी शेर्पाका अनुसार हिमपातका कारण पशुचौपाया बचाउन मुश्किल भएको छ। 

यस्तै, समुद्र सतहदेखि तीन हजार २०० मिटरमा अवस्थित फक्ताङलुङ गाउँपालिका–७ ओलाङचुगोला र चार हजार २०० मिटर उचाइमा अवस्थित याङमा बस्तीमा पनि बाक्लो हिमपात भएको स्थानीयवासी तेन्जी शेर्पाले बताए। भले, ग्याप्ला तथा मिक्वाखोला गाउँपालिका–६ तोक्पेगोला र पापुङमा समेत हिमपात भएको मिक्वाखोला–६ का वडाध्यक्ष डन्डु शेर्पाले बताए। समुद्र सतहदेखि तीन हजार ७९४ मिटर उचाइमा अवस्थित प्रसिद्ध धार्मिकस्थल पाथीभरा मन्दिर क्षेत्रमा पनि हिमपात भएको छ।

ताप्लेजुङमा यसवर्ष भएको यो दोस्रो हिमपात हो। यसअघि जिल्लामा पुस १३ र १४ गते पहिलोपटक हिमपात भएको थियो।