काठमाडौँ । प्रमुख सत्ता साझेदार दल नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आगामी आम निर्वाचनमा पनि आफू चितवनबाटै उम्मेदवार बन्ने बताएका छन्।

चितवन भूमिगत संयोजनात्मक जलसिँचाइ आयोजना, भरतपुरले भरतपुर महानगरपालिका–२७ बुद्धनगरमा निर्माण गरेको डिप ट्युबेल सिँचाइ प्रणालीको सोमबार अबेर उद्घाटन गर्दै उनले गत निर्वाचनमा आफूले चितवनका जनतासँग गरेको बाचा पूरा गर्दै आएको उल्लेख गरे। उनले आगामी निर्वाचनममा चितवन क्षेत्र नं ३ बाटै आफ्नो उम्मेदवारी रहने स्पष्ट पारे। भरतपुर महानगरको विकास लोभलाग्दो रहेको भन्दै अध्यक्ष दाहालले  यसलाई अझ उचाइमा पुर्‍याउन आफ्नो उम्मेदवारी रहने बताए। भूमिहीन, सुकुम्बासी र अव्यवस्थित बसोबासीलाई निर्वाचनअगाडि जग्गा वितरण गरिने उनको भनाइ थियो। ‘चितवनमा पहिलो चरणमा जग्गा वितरण गरिन्छ’, उनले भने।

त्यस्तै, ऊर्जा, जलस्रोत तथा सिँचाइमन्त्री पम्फा भुसालले पनि समृद्ध तराई–मधेश कार्यक्रमअन्तर्गत आयोजना सुरु भएको भन्दै भरतपुर र माडी क्षेत्रमा सो कार्यक्रम सञ्चालन गरिएको बताएकी छन्। यी क्षेत्रमा चार अर्बको लगानी हुने उनको भनाइ थियो। किसानले अब सिँचाइ अभाव महसुस गर्नु नपर्ने उनले बताइन्। सो अवसरमा ऊर्जा, जलस्रोत तथा सिँचाइ सचिव सागरकुमार राई, भरतपुर महानगरपालिका प्रमुख रेनु दाहाल, जलस्रोत तथा सिँचाइ विभागका महानिर्देशक सुशीलचन्द्र आचार्यलगायतको उपस्थिति थियो।
चितवन भूमिगत संयोजनात्मक जल सिँचाइ आयोजनाका प्रमुख देवकुमार स्याङवोका अनुसार सो क्षेत्रमा रु. चार करोडको लागतमा पाँच डिपट्युबेल प्रणाली निर्माण गरिएका छन्। यसबाट २०० हेक्टर जमिन सिञ्चित हुनेछ। जिल्लाका विभिन्न क्षेत्रमा यस कार्यालयले १७ ट्युबेल प्रणाली निर्माण गरिसकेको छ। ती ट्युबेल निर्माण गर्न रु. १३ करोड ६० लाख खर्च भएको उनको भनाइ छ। नयाँ निर्माण गरिएका ट्युबेलले ८७७ हेक्टर जमिन सिञ्चित भएको छ। 

सत्ता साझेदार दल माओवादी केन्द्रको निर्वाचन नजिकिँदै गर्दा पार्टी अध्यक्ष दाहालले आफ्नो गृहजिल्ला चितवनबाटै उम्मेदवार उठ्ने तयारी गरिरहेका छन्।