वर्षौँदेखि चरामा सीमित देखिँदै आएको बर्ड फ्लु (H5N1) मानिसमा फैलिन सक्ने खतरा अझै टरेको छैन भन्ने चेतावनी वैज्ञानिकहरूले दिएका छन्। पछिल्ला अनुसन्धान र मोडेलिङ अध्ययनले यदि भाइरसले मानिसबाट मानिसमा निरन्तर सर्ने क्षमता विकास गर्‍यो भने यसले विश्वव्यापी स्वास्थ्य संकट निम्त्याउन सक्ने देखाएको छ।

विश्व स्वास्थ्य संगठनका अनुसार सन् २००३ देखि २०२५ सम्म २५ देशमा ९९० जनामा H5N1 सङ्क्रमण पुष्टि भएको छ, जसमा करिब ४८ प्रतिशतको मृत्यु भएको छ। अमेरिकामा मात्रै यो भाइरसले करोडौँ चरालाई असर गरेको छ भने कृषि मजदुरसहित दर्जनौँ मानिस सङ्क्रमित भएका छन्।

भारतीय अनुसन्धानकर्ताहरूले तयार पारेको कम्प्युटर सिमुलेशन मोडेलले प्रकोपको सुरुआती चरणमै क्वारेन्टाइन, सम्पर्क पहिचान र लक्षित खोपजस्ता उपाय अवलम्बन गर्न सके महामारी नियन्त्रण सम्भव हुने देखाएको छ। अध्ययनअनुसार दुईदेखि १० केस नाघेपछि भाइरस समुदायमा तीव्र रूपमा फैलिन सक्छ।

विशेषज्ञहरूका अनुसार हाल मानिसमा जोखिम कम देखिए पनि भाइरसमा उत्परिवर्तन भई मानिसबाट मानिसमा सजिलै सर्ने अवस्था आयो भने स्थिति गम्भीर हुन सक्छ। यद्यपि, इन्फ्लुएन्जा महामारीका लागि उपलब्ध एन्टिभाइरल औषधि र खोपका कारण पूर्ण रूपमा असहाय अवस्था भने नरहेको उनीहरूको भनाइ छ।

वैज्ञानिकहरूले बर्ड फ्लुका घटनालाई नजिकबाट निगरानी गर्न, प्रारम्भिक चेतावनी प्रणाली मजबुत बनाउन र जनस्वास्थ्य प्रतिक्रिया छिटो तथा प्रभावकारी बनाउन सरकार र सरोकारवालालाई आग्रह गरेका छन्।