नेकपा (एमाले) का अध्यक्ष केपी शर्मा ओलीले आगामी ११ औं महाधिवेशनमा पार्टीका नीतिगत विषयमा कुनै विस्तृत छलफल नहुने स्पष्ट पारेका छन्। आइतबार काठमाडौंमा पार्टीको नयाँ लोगो सार्वजनिक गर्ने कार्यक्रममा उनले भदौ २३–२४ पछि उठ्दै आएका ‘नीतिगत पुनरावलोकन’ सम्बन्धी सवालहरूलाई अस्वीकृत गर्दै हालै सम्पन्न विधान महाधिवेशनले नै आवश्यक सबै समीक्षा गरिसकेको दाबी गरेका हुन्।

पार्टीका वरिष्ठ उपाध्यक्ष ईश्वर पोखरेललगायत नेताहरूले पछिल्ला राजनीतिक घटनाक्रमको वस्तुपरक समीक्षा आवश्यक रहेको जिकिर गरिरहेका बेला अध्यक्ष ओलीले भने, नीतिगत बहसको आवश्यकता नै नरहेको दोहोर्याएका हुन्।

अध्यक्ष ओलीका अनुसार राजनीतिक प्रतिवेदन, ऐतिहासिक समीक्षा, संगठनको अवस्था र नीतिहरूको विश्लेषण हालै सम्पन्न महाधिवेशनमा भइसकेकाले पुनः छलफल चलाउनु आवश्यक छैन। उनले भने, “विधानमा ठूलो हेरफेर गर्नुपर्ने अवस्था छैन। सानातिना आवश्यकता देखिए महाधिवेशनले छोटो विधिबाट टुंग्याउन सक्छ।”

ओलीले यस महाधिवेशनको मुख्य उद्देश्य संगठनलाई अघि बढाउने नेतृत्व चयन गर्नु रहेको उल्लेख गर्दै नीतिगत प्रश्न उठाइरहने आवश्यकताकै अभाव रहेको बताए।
उनका अनुसार महाधिवेशन कुनै असहमति प्रकट गर्ने प्लेटफर्म नभई, संगठनात्मक संरचना बलियो बनाउने प्रक्रियामा केन्द्रित रहनेछ।

एमालेको आसन्न महाधिवेशन नीतिगत बहसभन्दा नेतृत्व चयन र संगठन सुदृढीकरणमै केन्द्रित हुने स्पष्ट संकेत अध्यक्ष ओलीले दिएका छन्।