काठमाडौँ । राष्ट्रिय स्वतन्त्र पार्टी (रास्वपा) र विवेकशील साझा पार्टीबीचको एकता सभामा रवि लामिछानेले नक्खु कारागारबाट तीन सन्देश पठाएका थिए। रवि जेलमा रहेका अवस्थामा पनि पार्टी निर्णयमा प्रभावशाली बनेको चर्चा छ।

सन्देशमार्फत उनले एकता प्रक्रियामा सहभागी विवेकशील साझाका नेताहरूलाई स्वागत, केही समय विश्राम लिन र मिडिया ट्रायलबाट टाढा रहन सचेत गराएका थिए। पार्टी सचिवालयका सदस्यहरू पालैपालो कारागार गएर रविसँग परामर्श गरेर पार्टी निर्णय लिने कार्य गरिरहेका छन्।

रास्वपामा रवि नै सबै निर्णयमा प्रभावकारी हुने आरोप पनि लागिरहेको छ। पार्टीभित्र उनको विकल्प खोज्नुपर्ने आवाज उठ्दै आएको छ भने ध्रुवीकरण बढेको छ। पूर्वसहमहामन्त्री सुमना श्रेष्ठ र अन्य नेताहरूले नेतृत्वको व्यवहारप्रति असन्तुष्टि व्यक्त गर्दै पार्टी छोडेका उदाहरणहरू उल्लेखनीय छन्।

रवि लामिछानेले २०७९ साल असार ७ गते स्थापना गरेको पार्टी पाँच महिनामै समानुपातिक ११ लाख ३५ हजार मत र प्रतिनिधिसभामा २१ सिट जित्न सफल भएको थियो। तर उनका केही विवादित गतिविधिहरूले पार्टी भित्र नेतृत्व विकल्प खोज्ने मागलाई पनि बढाएको छ।

सचिवालय सदस्यहरूले भने रविको प्रभाव र सक्रियता भए पनि पार्टी विधि र प्रक्रियाअनुसार निर्णय लिइएको स्पष्ट पारेका छन्।